د اداري او مالي چارو مرستيال قاضي عبدالهادي فضلي د خپل اداري پرسونل سره مياشتنۍ ناسته وکړه

د بلخ پوهنتون د اداري او مالي چارو مرستيال قاضي عبدالهادي فضلي د خپل اداري پرسونل سره مياشتنۍ ناسته وکړه، ياده ناسته د ښاغلي مرستيال په خپل دفتر کې دايره شوې وه، چې پيل يې د قران عظيم الشان په څو مبارکو ايتونو سره وشو.

ښاغلي فضلي د ناستې ګډونوالو ته هرکلی ووايه او د هرکلي تر څنګ يې ترې مننه هم وکړه.

وروسته له مننې يې خپله اصلي موضوع د ګډنوالو سره شريکه کړه او له امرينو يې هيله وکړه چې د تېر 1402 لمريز کال لاسته راوړنې او د روان کال نوي ابتکارات مو راسره شريک کړئ.

لومړی د بلخ پوهنتون د اړيکو او عامه پوهاوي امر سميع الله بلخي د تېر کال پر لاسته راوړنو لنډ وغږېد او د روان کال لپاره يې د بلخ پوهنتون د نشراتو نوې طرحې وړاندې کړلې او په يادو طرحو کې د بلخ پوهنتون د رياست او معاونيت څخه همکاري وغوښته.

ورپسې همدا ډول د بلخ پوهنتون د نورو  بېلابېلو برخو امرانو خپلې لاسته راوړنې او د روان کال لپاره يې نوي نيول شوي پلانونه شريک کړل.

د غونډې په اخري شېبو کې ښاغلي فضلي يو ځلې بيا له خپلو کارمندانو مننه وکړه او ويې ويل: زه له تاسې ټولو خوښ يم، زمونږ او ستاسې دا ډول ناستې به يوازې د ورورګلوۍ په فضا کې د وطن د خدمت لپاره وي، دلته مونږ ټول سره يو شان يوو، امر، مدير ...ترمنځ توپيرونه به نه وي، ټول د يوې ادارې غړي يوو، هيڅوک په مونږ کې په يو بل بهتري نه لري، د رب په وړاندې بهتر هغه څوک دی چې تقوی لري.

نوموړي دې خبرې ته هم اشاره وکړه: دا نظام په وينو ګټل شوی دی، خپلو قدمونو سره به ډېر احتیاط کوئ، خپلو در سپارل شويو مسووليتونو کې به په هيڅ ډول ناغيړي، خيانت او غداري نه کوئ، که مو چېرته وکړلې؛ نو د هغه شهيدانو د وينو سره به مو ستر ظلم کړی وي، کومو چې درته دا نظام په خپلو  سپېڅلو او ارزښتمنو وينو وګاټه او واورئ دا د خدای شان دی، دا نظام لکه څنګه چې په سپېڅلو وينو  ګټل شوی دی؛ نو په هماغه شان سپېڅلی هم دی، چا چې هم ورته په کمه سترګه کتلي دي، خيانت يې ور سره کړی دی؛ نو رب خپله جزا ورکړې ده او د دې غيور او دردېدلي ولس په مخ کې یې شرمولي دي.

بلخ پوهنتون داړيکو او عامه پوهاوي آمريت.