په بلخ پوهنتون کې د عامه پوهاوي په موخه د کرنې او کانونو او چاپېريال ساتنې انجنيرۍ پوهنځيو په ګډې همغږۍ د پاک چاپېريال برابرولو او د ککړې هوا زيانونو په سرليک يو ورځنی علمي سمينار دائر شو.
سې شنبه د روان ۱۴۴۷ھ ق کال د شعبان المعظم مياشتې په ۱۵مه، په بلخ پوهنتون کې د پاک چاپېريال برابرولو او د ککړې هوا زيانونو په سرليک ترتيب شوي علمي سمينار پيل د قران عظيم الشان په مبارکو ايتونو سره وشو.
دغه سمينار چې د علمي چارو معاونيت اړوند د غونډو په عمومي تالار کې ترتيب شوی و، په پرانيستې وينا کې يې د بلخ پوهنتون علمي چارو مرستيال الحاج مولوي پوهنمل محب الله «هدايت» وويل: د عامه پوهاوي په موخه د دغه ډول علمي سمينارونو او کنفرانسونو برابرول ډېر ګټور دي، مونږ بايد يوازې په دې سمينار بسنه ونه کړو، لا نور دغه ډول ګټور سمينارونه په لاره واچوو؛ تر څو خلک د پاک چاپېريال په ګټو پوه شي.
همدغه راز ښاغلي مرستيال د سمينار ګډونوالو ته په خطاب کې وويل: چې ککړه هوا د روغتيا په زيان ده، بېلابېل ډول ناروغۍ رامنځته کوي؛ نو مونږ او تاسې ته په کار ده، چې د خپل ولس سره کښېنو او هغه موارد ورته په ګوته کړو؛ چې پاک چاپېريال او پاکې هوا ته په زيان دي.
همدارنګه ښاغلي هدايت ډېره کړه: چې زمونږ هدف پاکه هوا او پاک چاپېريال دی او په پاک چاپېريال کې د هېوادوالو روغتيا نغښتې ده.
ورپسې د بلخ پوهنتون کرنې پوهنځي استاد پوهنمل ميرويس «شريفي» په خپله ترتيب کړې مقاله کې د سمينار ګډونوالو سره د ککړې هوا په پېژندنې، سرچينو، په روغتيا او په اقتصاد تاثیر ارزښتناک معلومات شريک کړل.
د ياد علمي سمينار په دوام کې د کانونو او چاپېريال ساتنې پوهنځي استاد پوهنيار روح الله «فياض» په خپل ترتيب کړي کنفرانس کې چې (ککړه هوا د اقليم په بدلون کې څومره رول لوبوي او تاثيرات يې څۀ دي) په سرليک علمي بحث وکړ.
د يادونې وړ ده، چې په دغه سمينار کې د بلخ پوهنتون رهبرۍ سربېره، د بېلابېلو پوهنځيو رئيسانو، استادانو او اداري کارکوونکو ګډون درلود.
بلخ پوهنتون د اړيکو او عامه پوهاوي آمريت.
