په بلخ پوهنتون کې د ښوونې او روزنې پوهنځي محصلانو ته پروپوزل لیکنې علمي ورکشاپ ترسره شو!
د بلخ پوهنتون ښوونې او روزنې پوهنځي د څېړنې کمېټې له لوري، د فرهنګي او ورزشي کمېټې په همکارۍ، د دغه پوهنځي ۱۱ بېلابېلو څانګو څلورم ټولګي محصلانو لپاره د «پروپوزل لیکنې» تر سرلیک لاندې یو ورځنی علمي ورکشاپ ترسره شو.
د دغه ورکشاپ موخه د محصلانو د پروپوزل لیکنې د علمي او عملي وړتیاوو پیاوړتیا، د څېړنیزو موضوعاتو د سمې ټاکنې په اړه د هغوی پوهې لوړول او د معیاري علمي پروپوزلونو چمتو کولو په برخه کې د محصلانو مهارتونو پراختیا وه.
ياد ورکشاپ د استاد پوهنيار امرالله محمدي له لوري وړاندې شو. نوموړي استاد د څېړنیزې موضوع ټاکنې، د ستونزې بیان، څېړنیزو موخو او پوښتنو، د ادبیاتو کتنې، څېړنیزې مېتودولوژۍ او د سرچینو تنظیم په اړه محصلانو ته اړین علمي مطالب وړاندې کړل.
همدارنګه ښاغلي استاد د علمي او باوري سرچینو د کارونې، د پروپوزل بېلابېلو برخو د منظم تنظیم او د څېړنیزو موضوعاتو علمي ارزښت په اړه عملي لارښوونې وړاندې کړې او د پروپوزل لیکنې په برخه کې یې د عامو تېروتنو مخنیوي لارې چارې هم تشریح کړې.
په دغه علمي ورکشاپ کې د ښوونې او روزنې پوهنځي محصلانو په فعاله توګه ګډون درلود او د پروپوزل لیکنې اړوند یې خپلې پوښتنې له وړاندې کوونکي استاد سره شریکې کړې، چې د نوموړي استاد له لوري ورته لازم علمي وضاحتونه ورکړل شول.
نېټه: دوشنبه
۱۴۴۸/۴/۱۵ ھ ق
۱۴۰۵/۷/۶ ھ ش
۲۰۲۶/۹/۲۸ م
د نشراتو او عامه اړيکو آمريت
