په بلخ پوهنتون کې د مالي او اداري چارو مرستيال د خپل معاونيت اړوند پرسونل سره مياشتنۍ نوبتي ناسته وکړه!
پنجشنبه د روان ۱۴۴۷ھ ق کال په د جماد الاول مياشتې په لومړۍ نېټه، په بلخ پوهنتون کې د مالي او اداري چارو مرستيال د خپل معاونيت اړوند پرسونل سره مياشتنۍ نوبتي ناسته وکړه، د دغه ناستې پيل د معمول په شان د قران عظيم الشان په څو مبارکو ايتونو سره وشو.
د ناستې په پيليزه وينا کې، د بلخ پوهنتون مالي او اداري چارو مرستيال الحاج مولوي بخت محمد «مومن یار» د ناستې ګډونوالو هر کلی وکړ او د هرکلي ترڅنګ يې د خپلو کار کوونکو د ښو کارونو ستاينه وکړه.
ښاغلي مرستيال د ناستې ګډونوالو ته په خطاب کې وويل: چې پوهنتون د انسان جوړونې منظمه لويه فابريکه ده او د ټولو هېوادوالو سترګې همدې فابريکې ته دي. بايد په دنده کې درغلي ونه کړو، احساس پيدا کړو او دا دنده خپل اساسي مسووليت وګڼو؛ تر څو کوم تړون چې مونږ د دندې په پيل کې د هېوادوالو سره کړی دی، ورته پاتې را نه شو.
دغه راز ښاغلي مرستيال، له ګډونوالو هيله وکړه، چې د پوهنتون په نظم او دسپلين او نورو يو شمېر وروسته پاتې کارونو کې ورسره ستړياوې وګالي او هماهنګي پيدا کړي؛ تر څو هېوادوالو ته ښه خدمتونه وړاندې کړي.
د ناستې په پای کې ګډونوالو د ادارې اړوند خپلې ستونزې له ښاغلي مرستيال سره شرېکې کړې، چې په پايله کې ورسره د حل ژمنه وشوه.
بلخ پوهنتون د اړيکو او عامه پوهاوي آمريت.
