د اړيکو پراختيا او محصلانو ته د عملي زده کړو د فرصتونو برابرولو په موخه د بلخ پوهنتون پلاوي د سرې او برېښنا فابريکې له مسوولينو سره وکتل!
د بلخ پوهنتون يو پلاوي، چې مشري يې د مالي او اداري چارو مرستيال الحاج مولوي بخت محمد «مومن يار» کوله، د محصلانو چارو مرستيال او د محصلانو د انسجام آمر په ملتيا د سرې او برېښنا فابريکې له مسوولينو سره د اړيکو د پراختيا او ګډې همکارۍ په موخه دوستانه ليدنه وکړه.
په دې ليدنه کې د بلخ پوهنتون محصلانو لپاره د عملي زده کړو د فرصتونو پر برابرولو، د دواړو ادارو ترمنځ د همکاريو پر پراختيا او د محصلانو مسلکي وړتياوو د لوړولو په اړه خبرې وشوې.
د بلخ پوهنتون مالي او اداري چارو مرستيال الحاج مولوي بخت محمد «مومن يار» د يادې فابريکې له مسوولينو څخه د پخوانيو همکاريو له امله مننه وکړه او د دواړو ادارو ترمنځ يې د اړيکو او دوامدارو همکاريو پر پياوړتيا ټينګار وکړ.
همدارنګه، د بلخ پوهنتون محصلانو چارو مرستيال ډاکټر ګل خان «نبي زاده» د محصلانو د عملي زده کړو پر ارزښت خبرې وکړې او د فابريکې له مسوولينو يې وغوښتل، چې د پوهنتون له محصلانو سره د عملي زده کړو او مسلکي تجربو د ترلاسه کولو په برخه کې هراړخيزه همکاري وکړي، ترڅو محصلان د عملي کار په ډګر کې پياوړي او د ټولنې د خدمت لپاره په مسلکي توګه وروزل شي.
د سرې او برېښنا فابريکې مسوولينو هم د بلخ پوهنتون له مشرتابه پلاوي سره د ګډو همکاريو د پراختيا هرکلی وکړ او د محصلانو لپاره يې د عملي زده کړو د زمينې برابرولو او په دې برخه کې د هر اړخيزې همکارۍ ډاډ ورکړ.
نېټه: دوشنبې ورځ
۱۴۰۵/۶/۱۶ لمريز
د نشراتو او عامه اړيکو آمريت