په بلخ پوهنتون کې د کمپیوټر ساینس پوهنځي مسوولينو د ۱۶ بېلابېلو الکترونیکي پروژو نندارتون جوړ کړ!

په بلخ پوهنتون کې د کمپیوټر ساینس پوهنځي مسوولينو له لوري د عصري ټکنالوژۍ په بېلابېلو برخو کې د جوړو شویو ۱۶ الکترونیکي پروژو نندارتون جوړ شو، چې موخه یې د محصلانو د نوښتونو، عملي وړتیاوو او تخنیکي مهارتونو څرګندول او د ټولنې د اړتیاوو لپاره د علمي او ټکنالوژیکو حللارو وړاندې کول وو.

د دغه نندارتون په پرانیستغونډه کې د بلخ پوهنتون رئیس، شیخ القرآن والحدیث محمد سید «هاشمي» د عصري علومو د زده‌کړې، سالم عقل، فکري ودې او د علمي پرمختګ په برخه کې د ټکنالوژۍ پر ارزښت خبرې وکړې. نوموړي د عصري علومو زده‌کړه د ټولنې د پرمختګ لپاره مهمه وبلله او محصلان یې وهڅول چې خپلې علمي زده‌کړې له عملي نوښتونو سره وتړي.

ورپسې د بلخ پوهنتون مالي او اداري چارو مرستیال، الحاج مولوي بخت محمد «مومن یار» د محصلانو د نوښتونو او ابتکاراتو د ستاینې ترڅنګ وویل، د خوښۍ ځای دی چې محصلان د ټولنې اړتیاوو ته په پام سره علمي او عملي پروژې جوړوي او د ستونزو د حل لپاره هڅې کوي. نوموړي زیاته کړه، په تېر نږدې یو نیم کال کې د بلخ پوهنتون په بېلابېلو برخو کې د پام وړ پرمختګونه او مثبت بدلونونه رامنځته شوي او هڅې روانې دي چې د دغه دردېدلي ولس د پرمختګ او خدمت لپاره لا ډېر کار وشي.

همدارنګه د بلخ پوهنتون علمي چارو مرستیال، الحاج مولوي پوهندوی محب الله «هدایت» د عصري ټکنالوژۍ پر اهمیت، د علمي زده‌کړو او عملي مهارتونو پر تړاو او د نوې ټکنالوژۍ په برخه کې د محصلانو پر وړتیاوو خبرې وکړې. نوموړي د ټکنالوژۍ په برخه کې د نوښت او تخصص ترلاسه کول د علمي پرمختګ له مهمو اړتیاوو څخه وبلل.

په دغه نندارتون کې د کمپیوټر ساینس پوهنځي محصلانو خپلې ۱۶ بېلابېلې پروژې د هارډویر، سافټویر، روبوټیک، مصنوعي ځیرکتیا، ډیټابېس او نورو اړوندو برخو کې نندارې ته وړاندې کړې. د یادونې وړ ده چې د دغو پروژو شاوخوا ۵۰ سلنه د بازار د غوښتنې او اړتیاوو پر اساس د کارونې او فعالیت پړاو ته رسېدلې دي، چې دا د محصلانو د عملي وړتیاوو او نوښتونو څرګند ثبوت دی.

د یاد نندارتون په جوړولو، د محصلانو د علمي او تخنیکي نوښتونو په هڅونه او د هغوی د وړتیاوو په غوړېدو کې د کمپیوټر ساینس پوهنځي رئیس، انجنیر عبدالسلام احمدزي هڅې د ستاینې وړ دي، چې د محصلانو د عملي زده‌کړو او نوښتونو د پیاوړتیا لپاره یې زمینه برابره کړې ده.

په پای کې د کمپیوټر ساینس پوهنځي د مسوولینو له لوري د بلخ پوهنتون مالي او اداري چارو مرستیال او یو شمېر استادانو ته د هغوی د همکاریو، ملاتړ او هڅو د درناوي په موخه ستاینلیکونه هم ورکړل شول.

نېټه: چهارشنبه
۱۴۴۸/۵/۳۰ ھ ق
۱۴۰۵/۸/۲۰ ھ ش
د نشراتو او عامه اړيکو آمريت