په بلخ پوهنتون کې د حقوقو او سیاسي علومو پوهنځي محصلانو د (غزې د کړکېچ په اړه) د انساني وجدان له مخې، د ملګرو ملتونو د امنیت شورا د غونډې تمثيل نندارې ته وړاندې کړ!
دوشنبه د ۱۴۴۷ھ ق د جمادي الاولی په ۱۹مه په بلخ پوهنتون کې د حقوقو او سیاسي علومو پوهنځي محصلانو د غزې د کړکېچ په اړه، د انساني وجدان له مخې د ملګرو ملتونو د امنیت شورا د غونډې تمثيل نندارې ته وړاندې کړ، د دغه تمثيلي غونډې پيل د قران کريم په تلاوت کولو سره وشو.
د بلخ پوهنتون حقوقو او سیاسي علومو پوهنځي رئيس دکتور فيروز الدين «فيروز» په خپلو خبرو کې وويل: د خوښۍ ځای دی، چې زمونږ محصلان د خپلو استادانو په وړاندې، هغه زده کړې چې دوی په تيوري بڼه څارلي، په خپلو تجربو بدلوي.
دغه راز ښاغلي رئیس د «بيت المقدس»، په ارزښت او اهميت هم خبرې وکړې او د ناستې ګډونوالو ته يې زياته کړه، چې له دغه مبارک ځای څخه پيغمبر «ص» اسمانونو ته تللی دی، او دغه ځای د اسلام په تاريخ کې بهترين تاريخي ځای دی، بايد خپل اسلامي تاريخ ډېر ولولو او د کفارو پر وړاندې يې دفاع وکړو.
ښاغلي رئيس دا هم وويل: چې د انساني وجدان له مخې په ټولنيزو رسنيو کې د کفارو له لوري په هر اسلامي هېواد او په ځانګړي ډول پر فلسطین ظلمونه بايد په کلکه وغندو.
د همدغه پوهنځي بل استاد دکتور محمد طاهر «طاهر» د خپلې وينا په مهال وويل: چې په دنيا کې ډېر اسلامي هېوادونه شته او طاقتور هم دي ؛ خو له بده مرغه اسلامي تاريخ يې له پامه غورځولی دی، او د کفارو او يهودو له لوري پر مسلمانانو کېدونکو ظلمونو پر وړاندې چوپ پاتې دي.
ښاغلي طاهر - طاهر زياته کړه، چې په افغانستان کې په رښتيني ډول اسلام او اسلامي نظام قايم دی او تر خپله وسه د فلسطين له مسلمانانو سره خواخوږي لري.
د انساني همدردۍ په موخه د همدغه پوهنځي څو تنو نورو استادانو هم پر غزه د ظلمونو په مناسبت ويناوې وکړې او د غزې د کاميابۍ دعا يې وکړه.
ورپسې محصلانو د ملګرو ملتونو د امنیت شورا غونډې په موخه ګردی میز جوړ کړ او د غزې د مسلمانو سره يې د انساني او مسلماني همدردۍ په موخه تمثيل نندارې ته وړاندې کړ.
بلخ پوهنتون د اړيکو او عامه پوهاوي آمريت
