په بلخ پوهنتون کې د طبيعي علومو «نړيوال ژورنال» د کتنپلاوي غونډه ترسره شوه!
پنجشنبه د ۱۴۴۷ کال رمضان مياشتې په۹مه، چې د ۱۴۰۴ هجري شمسي کال د حوت ۷ مې سره برابره ده، د بلخ پوهنتون د څېړنو او علمي مجلې معاونيت کې د طبيعي علومو نړيوال ژورنال د هئيت تحرير غونډه د قرآن کريم په مبارکو آياتونو سره پیل شوه.
ورپسې، د څېړنو او علمي مجلې مرستيال پوهنمل دکتور حميدالله «عمرخېل» د مقالو د کیفیت لوړولو او د ژورنال پر نړيوالو معيارونو خبرې وکړې او د مقالو اصلاحاتو پروسه يې مهمه وګڼله.
د غونډې په دوام کې د اجندا مطابق، ۱۵ مقالې د هئیت تحرير غړيو ته د پرجيکټور پر پرده وښودل شوې، چې پکې يوه مقاله رد او د نورو په اړه اصلاحي نظريات ورکړل شول او د مقالو له لیکوالانو هيله وشوه، چې د سمونې په موخه ورکړل شوي نظرونه په خپلو مقالو کې په سم ډول پلي کړي؛ تر څو د اصلاح وروسته د اړوندې څانګې متخصصینو ته د تخصصي او هر اړخيزې کتنې لپاره ولېږل شي.
د يادونې ده، چې په بلخ پوهنتون کې د طبيعي علومو نړيوال ژورنال خپله لومړنۍ شمېره نشر کړې او دويمه شمېره به يې د مقالو نهايي تایید څخه وروسته چاپ او انلاين شي.
بلخ پوهنتون د اړيکو او عامه پوهاوي آمریت.
