بلخ پوهنتون سره، د روشن مخابراتي شرکت له لوري د بېلابېل ډول نيالګيو مرسته وشوه!
سه شنبه د شعبان ١٢ مه چې د سلواغې مياشتې ۲۳مې سره سمون خوري بلخ پوهنتون سره د روشن مخابراتي شرکت له اړخه د بېلابېل ډول نيالګيو مرسته وشوه، په دغه مناسبت بلخ پوهنتون د ادارې او عامه پاليسۍ پوهنځي د غونډو په عمومي تالار کې مراسم په پام کې نيول شوي و، چې پيل د قران کريم په مبارک کلام سره وشو.
د بلخ پوهنتون رئيس شيخ القران والحدیث محمد سيد «هاشمي» د دغه شرکت له اړخه د بلخ پوهنتون سره د ښکلا په برخه کې د شوې مرستې هر کلی او مننه وکړه، نوموړي د قران عظيم الشان په رڼا کې د ياد شرکت مرسته تل پاتې صدقه وبلله او په خطاب کې يې وويل د وطن رښتيني اولادونه همدغه ډول وي، چې د وطن په ښکلا کې ونډه واخلي.
د غونډې په دوام کې، د روشن مخابراتي شرکت د شمال زون مسوول د ياد مخابراتي شرکت پېژندنه وکړه او د نوموړي شرکت په پراخ فعاليتونو يې رڼا واچوله، چې په وينا يې ذکر شوي شرکت په ۲۰٠٣ م کال په افغانستان کې په کار پيل وکړ، چې تر دې دمه يې دميليونونو ډالر پانګونه کړې ده.
ورپسې د اطاق تجارت رئيس اسدالله اسدی د دريځ له سره وويل: چې بلخ پوهنتون يو اکاډميک ځای دی او چاپېريال يې سمسورتيا ته اړتيا لري، هغه زياته کړه چې په لنډ وختونو کې به د نورو تجارانو پام هم د بلخ پوهنتون زرغونولو ته راواړوم.
یاد مراسم د نوموړي پوهنتون د علمي چارو مرستيال مولوي پوهنمل حيات الله «حقجو» په دعا سره پای ته ورسېدل.
.بلخ پوهنتون د اړيکو او عامه پوهاوي آمريت.
