د بلخ پوهنتون څېړنو او علمي مجلې مرستيال او ورسره مل پلاوي د علمي اړیکو پراختیا په موخه کابل ته علمي سفر وکړ.
د څېړنو او علمي مجلې مرستيال ښاغلي دکتور پوهنمل حمیدالله «عمرخېل» او ورسره مل پلاوي د تجربو شریکولو او ګډو علمي همکاریو پیاوړتیا په موخه کابل ته علمي سفر وکړ.
په دغه سفر کې د کابل پوهنتون؛ د کابل ښوونې او روزنې، د کابل پولي تخنيک، افغان نړيوال اسلامي پوهنتونونو او د افغانستان علومو اکاډمۍ څخه لیدنې وشوې. پلاوي د دغو بنسټونو له رهبرۍ، د څېړنو محترمو مرستيالانو او علمي کادرونو سره ناستې وکړې او د کتابتونونو، علمي مجلو، لابراتوارونو او څېړنيزو مرکزونو څخه یې لیدنه وکړه. همدارنګه د څېړنو د پرمختګ، د علمي ژورنالونو د معیار لوړولو او د ګډو څېړنيزو پروګرامونو د عملي کولو په اړه نظريات تبادله کړل.
د يادونې وړ ده چې د پوهنتونونو تر منځ د علمي همکاریو پیاوړتیا، د څېړنیزو فعالیتونو په برخه کې د نويو تجربو ترلاسه کول، د علمي مجلو د نشراتي معیارونو پېژندنه، د لابراتواري چارو د مدیریت او تجهیز په برخه کې د غوره کړنلارو شریکول، او د ګډو علمي پروژو لپاره همغږي رامنځته کولو ډېره اړتیا ده، چې د همدې موخو لپاره ياد سفر هم تنظيم شوى و.
بلخ پوهنتون د اړيکو او عامه پوهاوي آمريت.
