په بلخ پوهنتون کې د محصلانو چارو مرستيال د درملنې کمېټې له غړو سره، د لوړو زده کړو وزارت د هدايت په اساس مشورتي ناسته وکړه!
د سې شنبه په ورځ د ۱۴۴۷ھ ق کال د ربیع الثانی مياشتې په ۲۸مه، په بلخ پوهنتون کې د محصلانو چارو مرستيال ډاکټر ګل خان «نبي زاده» د درملنې کمېټې له غړو سره د لوړو زده کړو وزارت د تازه مکتوب پر بنسټ مشورتي ناسته وکړه. د دغه ناستې پيل د بلخ پوهنتون د محصلانو د انسجام او خدمتونو چارو آمر قاري شير محمد «احمدي» لخوا د قران عظيم الشان په څو مبارکو ايتونو تلاوت سره وشو.
په دغه ناسته کې د ياد معاونيت محصلانو د انسجام او خدمتونو چارو آمر او د همدغه آمريت اثر لاندې د حقوقي کلينيک مدير او يو شمېر استادانو ګډون درلود.
د بلخ پوهنتون محصلانو چارو مرستيال ډاکټر ګل خان «نبي زاده» د ناستې ګډونوالو ته د محصلانو درملنې په برخه کې لازمې مشورې ورکړې او د دغه کمېټې له غړو يې هيله وکړه، چې خپل اداري تنظيم ته پوره پاملرنه وکړي. او په پلان سره مخته لاړ شي.
دغه راز ښاغلي مرستيال له خپلو همکارانو وغوښتل چې ناروغ او په ځانګړي ډول رواني ناروغو محصلانو ته د ښو خدمتونو وړاندې کولو په موخه ټولو پوهنځيو کې استازي وټاکي او له هغوی سره وخت پر وخت ناستې برابرې کړي.
بلخ پوهنتون د اړيکو او عامه پوهاوي آمريت.
