د بلخ پوهنتون څېړنو او علمي مجلو مرستيال د پوهنې ریاست مسوولینو سره د همغږۍ ناسته وکړه .
شنبه د ۱۴۴۷ هـ ق کال د روژې مبارکې میاشتې په ۱۸مه نېټه، د بلخ پوهنتون د څېړنو او علمي مجلې معاون د بلخ ولایت د معارف ریاست له محترمو مسؤلینو سره رسمي لیدنه ترسره کړه. د دې کتنې موخه د بلخ پوهنتون د استادانو او محصلینو لپاره د عملي کار او علمي څېړنو د ترسره کولو لپاره د مناسبو فرصتونو برابرولو او همدارنګه د معارف کارکوونکو د ظرفیت لوړولو لپاره د علمي او مسلکي پروګرامونو پر جوړولو بحث او خبرې وشوې .
په دې ناسته کې د دواړو ادارو ترمنځ د علمي او اکاډمیکو همکاریو پر پیاوړتیا ټینګار وشو او پرېکړه وشوه چې د متقابل تفاهم او همکارۍ پر بنسټ به د ګډو فعالیتونو د تنظیم لپاره یو هوکړه لیک هم ترتیب او لاسلیک شي. د یاد هوکړه لیک له مخې به د پوهنتون استادانو هغه علمي څېړنې او تحقیقات چې د معارف د تدریسي او تعلیمي کیفیت د ښه والي په موخه ترسره شوي، له معارف ادارې سره شریک کېږي.
همدارنګه پرېکړه وشوه چې د استادانو په ځانګړې توګه د ښوونې او روزنې پوهنځي استادانو ته به زمینه برابريږي تر څو په ښوونځیو او تعليمي بنسټونو کې عملي کارونه او څېړنې ترسره کړي چې دا کار به د پوهنې تدریسي بهیر ښه والي او د تعلیم کیفیت لوړولو لامل وګرځي.
د غونډې په پای کې دواړو لورو هوکړه وکړه چې د یادو همکاریو د پیاوړتیا لپاره به ګډ علمي سیمینارونه، روزنیز پروګرامونه او څېړنیزې ناستې هم په منظم ډول ترسره کېږي، تر څو د پوهنتون او معارف ترمنځ علمي اړیکې لا پیاوړې او اغېزمنې شي.
بلخ پوهنتون د اړيکو او عامه پوهاوي امريت
