د علمي معاونیت اړوند د مسلکي پراختیا آمريت له لوري د بلخ پوهنتون مرستیالانو او د پوهنځيو رئيسانو لپاره د کاري، عملیاتي پلان او راپور جوړونې درې ورځنی ورکشاپ پای ته ورسېده.
نن سه شنبه د روان ١٤٤٧ ه ق کال د شعبان المعظم مياشتې په ۲۲مه د بلخ پوهنتون علمي چارو مرستیال په هڅو د مسلکي پراختیا آمريت په همغږئ د بلخ پوهنتون مرستيالانو او د پوهنځیو رئیسانو لپاره د کاري، عملیاتي پلان او راپور جوړونې په اړه د درې ورځني ورکشاپ وروستۍ ورځ د معمول سره سم د قرآن کریم په مبارکو آیتونو سره پيل شوه.
لومړی د بلخ پوهنتون علمي چارو مرستیال الحاج مولوي محب الله هدايت د ګډونوالو هرکلی وکړ او د ورکشاپ په اړه یې لارښوونيزې خبرې وکړې او ګډونوال يې د يو بل خبرو ته احترام او درناوي ته را وبلل او غوښتنه يې وکړه چې په پوره ځيرتيا سره د پوهنتون په کچه خپل پلانونه او راپورونه په یو واحد فارمت کې ترتیب کړي ترڅو د لوړو زده کړو وزارت د کيفيت او باور لوړونې رياست د تائید وړ وګرځي.
ورپسې پوهنيار زوبين خواجه احمدي د اقتصاد پوهنځي کاري پلان د نمونې په څیر وړاندې کړ او د اصلاح په اړه يې د ګډونوالو نظرونه یې واخیستل.
وروسته بيا پوهنيار ضياء الله عارفي د عملیاتي پلان يوه ټولګه د نمونې په توګه له ګډونوالو سره شریک کړه.
د ياد ورکشاپ وروستۍورځ په دعا کولو سره پای ته ورسېده.
بلخ پوهنتون د اړيکو او عامه پوهاوي آمریت
