دنوي رئیس دپېژندګلوۍ غونډه
دوشنبه د روان ۱۴۰۳لمريز کال د وږي د مياشتې په دوولسمه د بلخ پوهنتون ریاست لپاره د نوي رئیس پېژندګلوۍ په مناسبت ناسته داېره شوې وه، چې پيل يې د محصلانو چارو د انسجام آمر له خوا د قرآنکریم په مبارکو آياتونو سره وشو.
په دغه ناسته کې لومړى د بلخ پوهنتون پخواني رئیس مفتی محمد شریف عثمانی راغلو مېلمنو ته د ښه راغلاست تر څنګ د مسؤلیت په اړه څرګندونې وکړې او د بلخ پوهنتون له پرسونل څخه یې د رياست په چارو کې د کمي او زياتي بخښنه وغوښته او نوي ټاکل شوي رئیس ته يې د مبارکۍ الفاظ وړاندې کړل.
ورپسې دبلخ ولایت مرستیال والی نورالهادي ابو ادریس د پخواني رئیس د هڅو او لاسته راوړنو ستاینه وکړه او د نوي رئیس لپاره په چارو کې دبریا هیله څرګنده کړه.
وروسته بیا د بلخ ولايت په استازولۍ د بشري سرچینو رئیس ښاغلي مولوي صاحب بخت الله مومنیار ګډونوالو ته په اسلامي افکارو د ځان جوړونې په هکله خبرې وکړې او د بلخ پوهنتون استادانو ته يې سپارښتنه وکړه چې د روزنې په ډګر کې خپلې هڅې ګړندۍ کړي تر څو ټولنې ته د خدمت لپاره وړ کسان ور وپېژني.
په پای کې د بلخ پوهنتون نوي ټاکل شوي رئیس شیخ الحدیث محمد سعید هاشمي د لارښوونېزو خبرو تر څنګ د مسؤليت په اړه وينا وکړه او مسؤلیت يې يو دروند بار وګاڼه او په ځانګړي ډول بیا د پوهنتون مسئولیت، چې د انسان جوړونې اړوند بنيادي حيثيت لري، نوموړي له ټولو منسوبینو څخه هيله وکړه چې په دې دروند مسئولیت کې ورسره مرسته وکړي او په چارو کې ور سره همغږي پاتې شي.
ناسته په دعا کولو سره پاى ته ورسيده.
دبلخ پوهنتون د اړيکو او عامه پوهاوي آمريت.
